نداء لكل مظلوم بقلم /ابراهيم سليم

شمس الشروق
بتطل فى الصبحيه
تنشر شعاع الخير بحريه
على ارض الصمود
ومعقل الوطنيه
والناس ماشيه الف وميه
تجرى ورا الرزق بعفيه
ويقولوا يا هادى يا رزاق
ارضينى بلقمه هنيه
وراحمنى من طابور العيش
ووقفة الجمعيه
دى مصر يا ناس فى نعمة بس
ماسكينها شوية حرميه
والناس من الظلم بقت فقرانه
ومن غير هدوم ماشيه عريانه
والدوا غلى واصبحت تعبانه
وبدون عشا بتبات جعانه
والاسعار ولعت
والطبقا العليا شبعانه
طب ليه نفرق بين الخلق
والروس زى ما بيقولو
متساويه وبلدنا بالخير مليانه
والناس فى كل مكان
بقت فى ذل ومهانه
الا الناس الى فوق
الى ودانهم سمعانا
وعيونهم فى كل مكان شيفانه
وان قلنا لا لو بصوت مخنوق
يجيبو لنا العساكر
ويضربونا الهجانه
ويطلعوا علينا بخطبهم الرنانه
ويقلوا البلد من غيرنا
تصبح منهوبه وبهتانه
حتى الارض من الظلم
بقت عطشانه وشرقانه
لافيها زرع ولا شجر ولا
حتى ورده وريحانه
ما تخفش يا عم محمد
ولا تبكى يا عم ياسين
بكره الفرج هيجى
بس انتوا قولو امين
والظلم مهما طال
مش باقى ليوم الدين
والعدل جاى يرفرف
بجناحه على الصفين
بيقول يا مظلومين
انتوا ليه ساكتين
ارفعوا راية العصيان
ومعاكم ربنا الحق المبين
ينصركم على كل ظالم
بس اصحوا يا مصريين
اصحو يا مصريين

بقلم /ابراهيم سليم